අළු සහ කඳුළු

අළු සහ කඳුළු

සම්ප්‍රාප්තිය

මහා වංසේ කබල්‍ ගාගෙන
නන්දි කඩාල් කළපුවේ
තලා පොඩිකර වසන්තය නැති
කැවුතු අවතැන් කඳවුරේ
අතුරු දන්වූ දූ පුතුන් වෙත
එරුණු කිරි උදුරා ලයේ
පිසු කිරිබත් කන්න අත්පා
දොවා පිරිතෙන් පැන්තියේ

දුප්පතුන් වඳකරන සැත්කම
අගනුවර හුණු අතුල්ලා
කොළඹ පැල්පත් දමා යන්නට
නීති දතමැද ගෙනල්ලා
මවන සුතරතුර යටදි නිවනට
ඇප්ලිකේෂන් දමල්ලා
දේශප්‍රේමී සූදු කෙළියට
ඔන්න පොරවල් ඇවිල්ලා


දයා නෙත්තසිංහ

රැවටීමේ පොරොන්දුව.

සමාදානය සහ යටහත් බව දේශනා කරන ආගම මිනිසුන්ට මරණින් පසු දිව්‍යමය ජීවිතයක් ලබා දීමට පොරොන්දු වෙමින් ඉතා වැදගත් සමාජමය ප්‍රශ්න වලින් වැඩකරන ජනතාව ඉවතට යොමුකරවයි. සූරා කන්නන්ට විරුද්ධව සහ සාමය ප්‍රජාතන්ත්‍රවාදය සහ සමාජවාදය සඳහා කරන සටනින් ඈත් කරවයි.

වී. ජී. අපනාසියෙව්
මාක්ස්වාදි දර්ශනයේ මූලධර්ම

බිඳ වැටීමේ අනතුර

''බලන්න සහෝදරයා.........මට නම් හොඳටම කේන්තියි ලෝකයේ මොනවද වෙන්නේ අපි ‍දන්නේ නෑ. සමහර විට මිනිස්සු හොඳට නත්තල ගත කරනවා ඇති. මොනතරම් දේවල් අනෙක් මිනිස්සු කරනවා ඇතිද ඒත් අපි මෙහෙමයි නත්තල ගත කරන්නේ.......

ඒක ඔබේ ඇතුලාන්ත‍යටම වදිනවා ඔබ අධ්‍යාත්මිකව නිශ්චිත දේශපාලන මූලධර්මවල පිහිටා නොතිබුණොත් ඔබ සම්පූර්ණයෙන්ම බිඳ වැටෙනවා. ඔබ අධෛර්යට පත්වෙනවා. මේ සාම්ප්‍රධායික නිවාඩු කාල සහ සාම්ප්‍රධායික උත්සව ඒ තරමටම අපේ හිත්වලට කා වැදිලා තියෙන්නේ..........."

කන්දෙන් නැගුණු ගින්දර
සැන්ඩිනිස්ටා ගරිල්ලකුගේ කථාව
සිතිජය මාධ්‍ය සංසදය
(2004 සැප්තැම්බර්)

මීයා

මා වෙසෙන උඩු මහලේ
මීයෙකුගේ වාසය ඇත
උගේ කර කර හඬ ඇසු විට
පිළිම නෙලන්නෙකු සිහි වෙයි
රෑ තිස්සේ පිළිම නෙළන

ඌ තම සිය සොඳුර සමග
රැගුම් රඟන විට සතුටින්
සුළං වේගයෙන් දුවද්දී
තරඟ වැදුණු අසකු ලෙසින්
උඩු මහලේ දූවිලි රොඩු
ලියන කොළය මත වැටුනත්
මා ලියමින් සිටිනා විට
ඌ දන්නේ කෙසේ ද එය...........!

මීයන් සමගින් වසනා
මම උන්ගැන සිතමි මෙසේ
උන්හට හොඳ අහර සමඟ
සුව නිවසක් ලැබුනා වේ
සීලිම මත සිදුරක් කොට
ඉඳහිට ඒ තුලින් ඔවුන්
මදෙස එබී බැලුවා වේ.

යොසානෝ අකිකෝ (1874 - 1941)
ජපන් ජාතික කිවිඳිය.

ජනේලයෙන් එන ආලෝකය.

නමුත් නවීන ධනපති ක්‍රමයේ සෑම ජනේලයකින්ම සමාජවාදය අපවෙත බැලුම් හෙලාගෙන සිටියි. මෙම නවීන ධනපති ක්‍රමයේ පදනම අනුව ඉදිරි පියවරක් වන සෑම වැදගත් කටයුත්තක් මගින් සමාජවාදයේ කටු සටහන එක එල්ලේ සහ ප්‍රායෝගික වශයෙන් සළකුණු කරනු ලැබේ.

ලෙනින් -
තෝරාගත් කෘති
පස්වන වෙළුම
263 පිටුව

අවතාර පිළිබඳ ළමා කතන්දරවලට පිළිතුරු

''බලයට පත් වූ සිය ප්‍රතිවාදීන් විසින් කොමියුනිස්ට්වාදී යැයි හෙළා දකිනු නොලැබූ විපක්ෂයක් ඇත්තේ කොහේද තමන්ට වඩා ප්‍රගාමී විපක්ෂවලට විරුද්ධ මෙන්ම තමන්ගේ ප්‍රතිගාමී පස ම්තුරන්ට විරුද්ධවද කොමියුනිස්ට්වාදය නමැති හංවඩු ගසන ලද දෝෂාරෝපණය දමා නොගැසූ විපක්ෂයක් ඇත්තේ කොහිද?

කොමියුනිස්ට්වාදීන් ස්වකීය පක්ෂයෙහිම ප්‍රකාශනයක් මගින් මුළු මහත් ලෝකය ඉදිරියෙහි විවෘත ලෙස ස්වකීය අදහස් ද ස්වකීය අරමුණුද ස්වකීය ප්‍රවණතාවයන්ද ප්‍රකාශ කළ යුතු කොමියුනිස්ට් අවතාරය පිළිබඳ ළමා කතන්දරවලට පිළිතුරු සැපයිය යුතු කාලය පැමිණ ඇත."

කාල්මාක්ස්
පෙඩ්රික් එංගල්ස්
කොමියුනිස්ට් ප්‍රකාශනය.

රැඳිවි‍යෝ

මහෞෂධ කුමරු මෙන්
සඳුන්ගැට මිටින්ගෙන
ඉපදුනේ නොමැති බව
කියන්නෙමි.....!

මත් කුඩුද මත් පැන්ද
ගිනි අවිද, කලුසල්ලි, කඩුකිනිසි
උදරයේවත් සඟවාන
නො ආ බව... දිව්රාම කියන්නෙමි.....!

ඔබේ අත රැඳුනු ගල්
දමා ගසන්නට පෙර
ඉඩදෙනවාද
මට යමක් කියන්නට......!

හිඟාකෑම වෙනුවෙන්
සොරකම් කලේ නම් අපි
ගොඩගසා ගැනීම වෙනුවෙන්
සොරකම් කරන්නේ කවුරුන්ද....?

නීතිගත කරන ලද
හොරබඩු තිබෙන්නේ
කා ළඟද....?

ජනවර්ජනලා වන්නෙමු
මහ උළුගෙදර I.R.C
චෝදනා තිබේ අපට
ලිපිගොනු පුරවා
බරපතල වැඩ ඇතිව
එල්ලා මරන්නට......!

අහේතු අප්‍රත්‍යවාදීව
පුබ්බේකත හෝතු වාදීව
අපරාධ කරුවන් නොවූ බව
ඉඳුරාම කිව හැකිය.

අසන්නට ඉඩදෙන්න
අවසන්ම පැනයත්......
ගල්දමා ගසන්නට පෙර
පවිකාරයාට.....!

පවට එරෙහිව
එක ගලක්වත්
ගැසුවාද ? ඔබ....!

- සැකකාරයා

සූදූ වීදිය

සේද මාවත දිගේ එන්න
සූදු වීදියට
ජැක්පොට්, කැසිනෝ, රේස් ඔට්ටු
සඳහාම නිදහස
දොර දොර නැගේ
මදහස..........!

මහානායක හිමිවරුනි
ජයපිරිත ජපකර
ඇල්කොහොල් සමග මුසුකර
බෝතල් කර දිය හැකිය
සූදු වීදියේ තැබෑරුම්වල.....!

කලා - කරු වෙනි ඉතිං
මැදගෙන වරෙල්ලා
දත කට
අඩියක් ගහන්නට
ස්‍ත්‍රි නිමිත්තක
සුව පහස විදින්නට
මැතිවරණ සමයේදී විකිණූ
සංවේදී ඉඳුරන්ම
පිනවන්ට.......!

බුද්ධිමතුනි
දුරාචාරය සදාචාරයවන බව
අසිරිමත් ලෙස
ජනතාව දැනුවත් කරපල්ලා
අලි ගිල්ල ජූල්
සාලය මැදට හලන
රජයේ මාධ්‍ය වලින්ම.....!

වනිතාවනි
ලොව පැරණි වෘත්තියට
අයදුම් පතක් දෙන්න
ආර්යාවට
සූදු වීදියේ සිට
නිමිති පා
මොනරු අහුලන්නට........!

කොල්ලනි වරෙල්ලා
රැකියා විරහිත
සූදු වීදියේ
ටිකට් කඩන්නට.....!

සරසවි සිසුනි
වලපල්ලට ගියාදෙං
නිදහස් අද්දියාපනේ
උපාධියටත් වඩා
වටිනවා මේ රටේ
කුපාඩිකම..........!

සපෝරුයි දැන් ඉතිං
ආසියාශ්චර්යය.........!
පක්ෂියා ඉගිලී
බූරුවා රජ වී.

සැකකාරයා

අතුර සහ අනතුර

පොල් කෙඳිම
එකතු වී
තනාදී තිබේ
මල් තලන්නට
යන මගත්.....!

- දයා නෙත්තසිංහ -

නොකළ - කළයුතු.......

පාලකයෝ
සොයන විට
ආලවකයෝ
හමුවන........
මුළු මහත් ක්‍රමයම
වෙනස්කල යුතුව ඇත.

- සැකකාරයා -

දැති සහ රෝද

නිර්ධන පංති සාහිත්‍ය හා කලාව මුළු නිර්ධන පංති විප්ලවවාදී ව්‍යායාමයෙන් කොටසක් වේ. ඒවා ලෙනින් කී පරිදි මුළු විප්ලවවාදී යන්ත්‍රයේ දැති සහ ‍රෝදය.

මාවෝ සේතුං
සාහිත්යත හා කලාව ගැන.

වැටුප

වැටුප වූ කලී කම්කරුවා විසින් නිපදවන ලද හුවමාරු භාණ්ඩයේ, ඔහුගේ කොටස නොවේ. වැටුප යනු ඵලදායී ශ්‍රම ශක්තියෙන් නියමිත ප්‍රමාණයක් ධනපතීයා විසින් තමාට මිලදී ගන්නා දැනටමත් පවතින හුවමාරු භාණ්ඩවල කොටසක් වේ.

- කාල් මාක්ස් -

සටනින් තොර ජයක් නැත.

විවිධ රටවලදී එය (විප්ලවය) විවිධාකාරයෙන් වර්ධනය වෙයි. එය නිතරම දිගු කලක් තිස්සේ දුෂ්කරතාවන්ගෙන් යුතුව ගමන් කරයි. ධනපතීන් තමන්ගේ අයිතින් එක්වරම අත්හරිතියි සිතන සමාජවාදියා නරකය. නැත. ලෝකය විසින් තවමත් එවැනි කරුණාබරිත ධනපතීන් බිහිකර නැත. සමාජවාදය වර්ධනය විය හැක්කේ ධනවාදය සමග කරන අරගලයෙන් පමණි. සටනින් තොරව යටත් වූ පාලක පංතියක් ලොව කවරදාවත් පැවතී නොමැත.
ලෙනින්
1918 දෙසැ. 14 දින
ප්‍රියෙස්නයා දිස්ත්‍රික්කයේ
කම්කරු සමුළුවකදී කළ කථාවෙන්,

වේල් රතය

නිල්වන් අහසට
උස් වී සිටිනා
උත්සව රතයෙන්
රැස්කඳ විහි‍දෙයි
තද තෙද බල මහිමෙන් යුත් වූ .......
වියකර දරමින් පහලින්
සිටින ගොන්නු හෙම්බත් වී
අන්තිමටම හෙම්බත් වී
කට දෙකොනින් පෙණ වගුරති
හති ඇර ඇර.........!
හති ඇර ඇර........!
උන් ඇදගෙන
යන හින්දා
උත්සව රිය
ගමන් කරයි
ගොනුන්ට ඉහලින් රතයේ
උඩට නැගුනු මුඳුන් පෙළේ
අලංකාර ලෙස සැරසූ
ලී අස්සයෝ
ආඩම්බර ලෙස පනිනා
ආකාරයකින් සිටිති...!

වියකර දරමින් පහළින්
අන්තිමට හෙම්බත් වී
ඉන්නා වූ මහලු ගොනුන්
බොහෝ අයට අමතක වී....



ආර්. මුරුගයියන් (ශ්රි. ලාංකික)
පරිවර්තන - කරුණාරත්න අමරසිංහ