වියමන හැඟවුම සහ හැඟවුම් කාරකය

කටුනායක පොලිස් වෙඩිතැබීම ගැන ජනාධිපති
පොලිස් පතිගෙන් සම්පූර්ණ වාර්තාවක් ඉල්ලයි...
(පුවතක්)


බාලේ මෙහෙ ‍වරෙන් කටුවක් ඇත කන්ට
කාලේ බොහොම නපුරුයි බැහැ නිදියන්ට
සීලේ තබමි ඊළඟ පෝයට ගන්ට
වේලේ රහට ඇඟමස වුව ගම් කන්ට

හොල්ලන් කන්න සේවක වැටුපෙන් ගන්න
කොල්ලන් මරා වුව කම් නැත ඉඩ ගන්න
පොල්ලෙන් බැරි උනොත් උන්ඩෙන් වැඩ ගන්න
පල්ලන් බසිනු බෑ ඕනෑ ගොඩ යන්න

වැඩේ වැරදුනොත් බාලේ උඹ ගෙදර
කඩේ යන්න තනතුරකුත් දෙමි විරල
පදේ හැටියටම නැටුවොත් උඹ සරල
අඩේ ඉතින් උඹටත් අරලිය සිසිල

මීයේ පැණි හිඟයි බැහැ අත ලෙවකන්ඩ
ඊයේ පනත යලි ගෙන එමි ලේ බොන්ඩ
සීයේ කියන තුරු මට රට කරවන්ඩ
ආයේ කතිර යුද්ධෙන් මම දිනවන්ඩ

සැකකාරයා

පුනරුත්ථාපනය

හිටපු ‍කොටි සාමාජිකයන්ට පෙළ පොත් (පුවතක්)

අල්ලට තරම් වත් ඇති නිදහසම තකා
බල්ලට බෙදන තරමට හිරබතම කකා
''කල්ලට" කරන ගැරහුම් දැලි කුණෙන් මකා
වන පොත් කරමි පෙළපොත් ජීවිතය පතා

නංගී කකුල නැති උඹ කඳවුරේද....?
අක්කගේ ඇස් දෙකෙන් ලෝකය දකීද....?
අප්පා දණ නොගා පයබිම තබාද....?
කඳවුරේ වැටෙන් නිදහස ලැබේද....?

නුගගහයට ඇති ගණදෙවි රූපෙට
මින්පසු ඉඩකඩ නැතිවෙනවා.....!
සිංහල සිරිතට හතර පෝයටම
අපි මෙහි සිල්රෙදි පොරවනවා.....!

ලොකු ලොකු අය එන උත්සව වලටත්
අත්පුඩි ගහන්න අපියනවා.....!
ඊට පස්සේ ඒ වැසිකිලි සේරම
අපේ අත්වලින් සෝදනවා.....!

සාමා අමර සල්මල් ගහයට ඉඳිතී
සිංහල හෝඩ්යෙන් මම අකුරක් අඳිමී
බුද්ධාගම පොතේ හැටියට මෙත් වඩමී
සිංහලයෙකු වෙලා මම නිදහස ලබමී.

සැකකාරයා

විකල්ප පුවත්පතක ප්‍රාදේශිය මාධ්‍යවේදියාගේ හෙලිදරව්ව

රහසක් සොයාගැනුමට
මම ගියෙමි
දිනක් රජයේ කාර්යාලයකට
''අන්න අර කපුටා ඇවිත්"
ලොක්කාට ගොස් කියනු
ඇසුනි මට එහි අයෙකු
අමනාප නොවූවෙමි
''කපුටා කසළ ‍ශෝධකයෙකි"
ඇරත් වූ තනිව කිසිවක් නොබුදින නිසාවෙන්.....!

තවත් එක් දිනයක මම ගියෙමි
පොලීසියේ මහත්වරු
අපරාධ පරීක්ෂණ කරනා තැනකට
''අන්න අර වල් ඌරා ඇවිත්"
ලොක්කෙකු කියනවා ඇසුනි
ඔහු වැනිම තවත් අයෙකුට
ඔව් ඇත්ත
''මහ පොලොව බිඳ
අල මුල් සොයා ගන්නා බැවින"
කීවාට කමක් නැත මට
අමනාප නොවූයෙමි මම.....!

ප්‍රාදේශීය සභා මන්ත්‍රී
ත්‍රිපෝෂ ‍බෙදන උත්සවයක
අසුන්ගෙන සිටියෙමි මම
මගේ සඟයින් අසල
''අරයකා මළ ඇණයක්"
කවුද එන්න කීවේ ඔහුට.....!
මගේ සඟයෙකුගෙන් විමසනු
ඇසුනි මට
අමනාප නොවූයෙමි මම
''එක අරමුනක දිගුකළක්
ඇණයකට රැඳී ඉන්නට පුළුවනි"
ඇරත්
''මළබැඳී නැසෙන තුරු
ඊට සේවය කළ හැකිය....!"

ප්‍රාදේශීය ලේකම් කාර්යාලයේ
මට ලැබුණු තොරතුරකට එහිගියෙමි මම
''අන්න අර බූරුවා ඇවිත්"
කෝපාවිශ්ඨව පෙනුමෙන් මහත්මයෙකු
කියනවා ඇසුනි මට
ඇසෙන නෑසෙන ගානට!
''බූරුවා මත තබන බර
ගමනාන්තය වනතුරු
බිම නොතබන නිසාවෙන්
අමනාප වන්නේ කුමකටද මම.."!

පළාත් සභා මන්ත්‍රි
දෙවෙනි වරටත් මුල්ගල තබන
උත්සවයක
උන්දැම උන්දැගේ කටින්
ලේකම්ට බැනවැදුනු බව දනිමි
''කව්ද අර බල්ලාට එන්න කිව්වේ ?"
අමනාප නොවූවෙමි
''මිනිසා‍ගේ විස්වාසවන්තම සත්වයා
බල්ලා නිසාවෙන්.....!"

ඇමතිගේ සම්ප්‍රාප්තිය
බලන්නට ගියෙමි මම
''අර වසංගතයත් ඇවිත්"
උතුමෝම සංවිධායකගේ කනට
කොඳුරා නොකීවෙද?
අමනාප නොවූයෙමි මම
''ඇතැම් වසංගත
තත්වයන් වෙනස් කරනා නිසාවෙන්...."!

තවත් තොරතුරු
බොහොමයක් ඇත කියන්නට
එහෙත්මට ඉඩ දෙන්න
නාද වෙනවා මගේ ජංගම දුරකථනය.....!

දයා නෙත්තසිංහ

"දිවිනැගුම හෙවත්" වවාගෙන කෑම

අල්ලපු රටේ කොටි කඳවුරු තුනක් පෙනී
ගම්පොල මාමා දඟලයි අමුඩයත් පෙඟී
හදිසි නීතියට නැතිකොට පොටක් හැඟී
වවාගෙන කන්න කොටි මයිලකුත් ගමී

කොළඹ වතු වලින් පන්නා නැති ඈයෝ
ගෙනමු රටවලින් කහවනු ඇති ඈ‍යෝ
තුඹස මුදුන්කර බැ‍‍ඳ දුන්නද වේයෝ
බලන් දරණු ලාගති ආයෝජකයෝ

ඔන්න බලන් ගන්නට අපෙ දිවි නග්ගා
කන්න පොටක් පාදාගෙන උන් නැග්ගා
ණයෙන් - දඩෙන්, බද්දෙන් අපි දන ගස්සා
ගහෙන් වැටුන මුත් අනිනවා කිරි පුස්සා

වැල්ලේ ඉඩම් වැල්ලේ යන සුද්දන්ට
ගොල්ලේ ඉඩම් රජ පවුලේ කබ්බොන්ට
අල්ලේ ඉඩක් වත් නැති කොට පැළවෙන්ට
රැවුලේ වවා දෙන්නද බාගෙන කන්ට

"අපි වෙනුවෙන් අපි" ගෙව්වා අපා දනී
අපි වෙනුවෙන් තොපි කන්නට උපා දනී
අපි ලව්වා තොපි වැව්වා තොපා දනී
අපි ලෙව්වා තොපි කෑවා රටා දනී

- සැකකාරයා -

"බලුකුණ සහ බුදුගුණ"

ප්‍රභාකරන්ගේ මව ආදාහනය කළ අළුගොඩ මත
වෙඩිතබා මරා දැමූ බලු කුණු තුනක්
- (බුදුන්ගේ දේශයෙන් වාර්තා වූ පුවතක්)



බණේ දන්න උන්ගෙන් වෙඩිකා මියගිය බල්ලා
තනේ කිරි දුන්නු මව්ගේ සොහොනේ දැප වෙම්මා
අනේ අළු නොවී නොමැරී සිටියේ නම් අම්මා
මරා දැමූ බල්ලන්ටත් සෙනෙහෙ උපදවන්නා

අනේ බණෙන් අළුයම අපි ඇහැරෙන්නේ
ගුණේ හොඳ පිරිත් පැණියෙන් නාවන්නේ
කොනේ දත් අතර බුදුරැස් හප වෙන්නේ
කුසේ දඩමසිනි හිස්තැන් පුරවන්නේ

මුහුද තරම් අම්මාවරු වැලපෙන්නේ
අහස තරම් ලේකිරිකර පුද දෙන්නේ
මහ පොළොවටත් වැඩියෙන් දුක් උහුලන්නේ
ඉතිං මළ කුණෙන් කෝමද පලිගන්නේ

සෙනේ ඇති වෙනස කෝමද වෙනම කිරා ගන්නේ
තනේ කිරි එකයි අම්මගෙ පැටව් උරා බොන්නේ
ගුණේ මව්සෙනේ ලය ලේ කිරට පෙරී එන්නේ
අනේ එහෙව් අම්මට‍ දෝ මෙහෙම නිගා දෙන්නේ

පිණේ ‍එකතුකර ඇත්තන් වනේ සැරිසරන්නේ
තුනේ පිටකයෙන් නිවනට පාර කපා ගන්නේ
කණේ ඇණ ඇණම බුදුබණ බොක්ක පුරෝ ගන්නේ
දෙණේ පළිගසන තිරිසන් රටකද අපි ඉන්නේ....?
- සැකකාරයා -

උතුරු වසන්තය

මැරි මැරී වැටෙන මිනිසුන් අතර
නිවි නිවී දැල්වුනු පනකෙන්ද රැගෙන
මුක්තිය පතා මුක්ත කලාපෙට
කරන්නට යෙදුනු අභිනික්මන

හැපී පය කාගේ හෝ මළ කඳක
ලය කඩා වැටී ඉකිබින්ද බව
ජීවිතය ඉල්ලමින් මග වැටුනු
අයට පිළිතුරු නොදී පැමිණි බව

කළපුවල බැස එන විට
උණු කඳුළු සේදී ගිය බව
ගැඹුර මැනගනු නොහැකිව
දරු පැටව් කළපුවට භාර කළ බව

ෂෙල් වැසි වැටුනු තැනදී
ඔප්පු ගිනබත් වූ බව
බුක්තිය තිබුණු තැනකම
හිමිකම අහිමි වූ බව

කෆීර් පක්ෂීහු
දඩයමට වැද ගිය තැන
අපි තවම සිටින වග
වෘකයන් අතර නග්නව

අකුලා පැමිණි ජීවිතය
එලාගන්නට තැනක් නැතුවාම
වසන්තය එතැයි හීනෙකින්වත්
ඔබ සිතාගන්නේ කෝම . . . ?

- දයා නෙත්තසිංහ

මිත්‍රවරුණි

අම්බුළුවාවේ මනමාළයාට

''සැප විඳින්ට ඕනෑනම් දුක් විඳින්න - ඒ නිසා ගං වතුර ගැලුවට, බඩු මිළ ඉහල ගියාට කමක් නෑ. අටලෝ දහමට අනුව කල්පනා කරන්න. සිදුහත් කුමාරයා මාස හයක් දුක් වින්ඳා. ඊට පස්සේ සදාකාලික සැප ලැබුවා''
- අගමැති බණ කියයි.


පවුල් ගහට පිටදීගෙන බුදු වෙන්න
අවුල් නැතිව පිං ඇති තනතුරු ගන්න
රැවුල් කපාගෙන ලුණු කැඳ බී ගන්න
වවුල් පිං පියාගෙන් බණ අහගන්න

උද්ධමනේ බඩුමිළ විරැකියාව
කරුමය තමයි නැත එහි මාෆියාව
අසිරිය මවන්නට නම් ආසියාව
ගෙදරින් පටන් ගනු දුෂ්කර ක්‍රියාව

මන්තරේ රහ‍ට බුදුබණ උයා පිහා
ගින්දරේ සිටින ජනයට බෙදා පියා
තනතුරේ සැපට වැඳ වැඳ අනාතයා
අන්දරේ තමයි ගම්පොළ පණික්කියා

දං කොඩ උනත් සැප යැයි දිය වන්නාවේ
කං කොට බූරුවා සබයට ඇන්නෑවේ
පිං පොත පෙර‍ලගෙන අම්බුළුවාවාවේ
අං ගොඩ යන්න පිං ඇති අම්බිලි මාමේ.

- සැකකාරයා

වානේ බඩු

"ඊ නිවුස් කාර්යාලය ගිනි ගැනීම."
යට ඇඳුම් උපත් පාලන කොපු මත්පැන් බෝතල්
ඊ නිවුස් කාර්යාලයෙන් සොයා ගනී.
- දිනමිණ -



ගිණි ගැනුණි මෙවලම්
අළු නොවිණි සරදම්
රෙදි නැතිව පන්දම්
බෙරේ ගෙදරින් නැගෙන අන්දම්

රජුගේ දුකට පුං අල්ලන මෝචපාල
හීනෙන් දකින පුවතකි විළි නැති බාල
ඉතිරිව යට ඇඳුම් කොන්ඩම් රට බීම
අලුගොඩවල් තුලින් මතුවීමය පුදුම

අසිරිය ඇති රටේ ඒකත් එහෙම උනී
ජංගි යකඩ කොන්ඩම් වානෙන් තැනුනී
උලා කා මකරු පිරුවට තුල එතුනී
''බාල ගිරි'' දොසම නීතියටත් හැදුනී.

- සැකකාරයා

වෙළඳ සංගමේ කරුණාව

කඩ පේලියේ ඉඩකඩ සීමිත හෙවනේ
බල්ලෝ ලගින තැනකම නුඹ ඇස නිව්නේ
මරණෙට හේතු සියොළඟ සිරුරේ තිබුනේ
වෙළඳ සංගමේ පිංවත් ඇස ඇරුනේ

වැරහැලි ඉවත්කර වස්තර සළු පොරවා
බස් නැවතුම් පොලම 'සුදුවට' හැඩකරවා
මල්සාලාවේ මිල වැඩි යහනක හිඳුවා
වෙළඳ සංගමේ පදමට තෙළ බෙදුවා

මහා ඇමති මංතිරි පිරිවර කැටුවා
ධර්ම කථිකයෝ ලාබෙට බණ දෙසුවා
ගෙරිහම තැලී හේවිසි විතරක් හැඬුවා
මඩනැති පාවාඩ වල කටටමඑලුවා

අනේ පුදුම බත් වේලක් නොදුන් අය
හිත හැදුමට වචනයකුදු නොදුන් අය
විලි වැහුමට වැරහැල්ලක් නොදුන් අය
කෙළ කෙළ අවමගුල ජයටම කෙරූ අය

හැන්දෑවේ අයවැය සද්දේ ඇසුනී
වෙන්කල ඉතිරි මුදලින් බෝතල් කැඩුනී
පැය විසිහතරේ මෙත් බෝසත් ගුණ මැකුනී
ඉඳුල් වතුර ඉල්ලන අයටම වැදුනී

- දයා නෙත්තසිංහ

අළුත් නිදහස

වෙඩි වැදුනු මළ සිරුරු ඇවිදිති
හමට යට පපු කැවුතු පැසවති
දුමක් නැති ගිනි අඟුරු නලියති
නමක් නැති මළ සිරුරු හමුවෙති

තුන් බියට අමතර බියක් වෙති
තුන්රුවන මහමගත් පෑගෙති
තුන් යාමේ නපුරම මුදුනි වෙති
තුන් දොරම උණ්ඩයට යට වෙති.

සැකකාරයා

''ජාතික ගීය සිංහලෙන් පමණක්ලු''

ඇමති හෙළුවෝ වනති හෙළුවමැ
හෙළුවැ වනමුය හෙළයැ වනමුයැ
ඉතිං ජාතිකැ ගීය කියවුමැ
හෙලැබසින් හෙළැයන්ට පමණයැ

ගීය ජාතික කොඩිය ජාතික
ඇඳුම ජාතික කෑම ජාතික
බීම ජාතික ඇල්ම ජාතික
බැල්ම ජාතික පුක විජාතික

උකුස්සා

''දඬු මුගුරු වලින් පහරදීමෙන් හෝ බිය වැද්දීමෙන් තර්ජනය කිරීමෙන් හෝ බුද්ධිය විනාශ කළ නොහැක.''
පැට්‍රික් ලුමුම්බා

මැද ‍මාවත

"මැද මාවතක් නොමැත රදළ උරුමක්කාරයින්ද, බුද්ධි වාදීන්ද, වංශවත් පුංචි මහත්වරුන්ද, නරක පොත් වලින් නරකට උගත් අයද මැද ‍මාවතක් ගැන සිහින දකී. ලෝකයේ කිසිම තැනක මැද මාවතක් නැත. තිබෙන්නට පුළුවන් කමක්ද නැත. එ‍ක්කෝ (සමාජවාදී විප්ලව වාදීන් සහ මෙන්ෂෙවික් වරුන් කියන ජනතා ආණ්ඩුව ආණ්ඩුක්‍රම සම්පාදක මණ්ඩලය නිදහස යන ආදී සටන් පාඨ නැමැති පිරුවටයෙන් අලංකාර වූ) ධනපති ආඥා දායකත්වය නැතහොත් නිර්ධන පංති ආඥා දායකත්වය 19 වන සියවසේ මුළු ඉතිහාසයෙන්ම මෙය ඉගෙන ගැනීමට අසමත් අයෙක් වෙතොත් හේ අන්ත මෝඩයෙකි."

ලෙනින් තෝරාගත් කෘති
10 වෙළුම 36 පිටුව

දියණියගේ ඉල්ලීම

ජාතික ගීය සිංහලෙන් පමණක් ගැයීමේ ශ්රීන ලංකා ආණ්ඩුවේ තීරණයට විරුද්ධ වූ අධ්‍යාපන අධ්‍යක්ෂක තම දියණිය ඉදිරිපිටදීම මරා දමයි. -(පුවතක්)


නමෝ සිංහයා ගොරවාගෙන කොඩියේ
නමෝ කඩුවකුත් අරගෙන මුර කෙරුවේ
නමෝ බෝපතින් බෝසත් ගුණ ඇඳුණේ
නමෝ රෑ තමයි අප්පට වෙඩි වැදුණේ

නමෝ නමෝ අම්මාගෙන් කිරි පෙවුණී
නමෝ නමෝ ජය පිරිතෙන් පැන් වැඩු‍ණී
නමෝ නමෝ කිරි බත මහ මග ඉදුනී
නමෝ නාඳුනන උණ්ඩෙන් ළය පැලුනී

නමෝ මෙහෙයුමෙන් - අප මුක්තිය ලැබුණී
නමෝ උණ්ඩයෙන් - අප සත්‍යය මැකුණි
නමෝ ශක්තියෙන් - භීතිය හද රැඳුණී
නමෝ විත්තියෙන් - ප්‍රාණෙට වෙඩි වැදුණී

නමෝ නමෝ කොඩියේ ඉඩ ඔබ ගන්න
නමෝ නමෝ ගීයත් පවරා ගන්න
නමෝ නමෝ ඒ ඔක්කොම ඔබ ගන්න
නමෝ නමෝ අප්පච්චී මට දෙන්න

- සැකකාරයා